Samtök opinberra innkaupaaðila stofnuð
Samtök opinberra innkaupaaðila voru stofnuð á fundi í Reykjavík 1. október síðastliðinn. Markmið samtakanna er meðal annars að efla tengslamyndun meðal opinberra aðila sem sinna innkaupum, auka faglega þekkingu og efla ímynd opinberra innkaupa.
Sveinbjörn Ingi Grímsson annaðist skipulagningu og utanumhald stofnfundarins. Á fundinum var tíu manna stjórn samtakanna sjálfkjörin.
Stjórnina skipa:
Agla Margrét, starfsmaður FSRE
Alda Kristín, starfsmaður Vegagerðarinnar
Kjartan, starfsmaður HSS
Anna Marín, starfsmaður Fjarðabyggðar
Hildur Georgs, starfsmaður Orkuveitunnar
Sigrún Svava, starfsmaður FSRE
Hulda, starfsmaður Landspítala
Bergþóra, starfsmaður Akraneskaupstaðar
Katrín, starfsmaður Kópavogsbæjar
Sigurður, starfsmaður Betri samgangna
Á stofnfundinum flutti Martin Magnusson, formaður Sveriges Offentliga Inköpare, erindi. Sænsku samtökin voru stofnuð árið 1979 og vinna að þróun og aukinni skilvirkni opinberra innkaupa með fræðslu, þekkingarmiðlun og þátttöku í stefnumótun og umræðu um málaflokkinn.
Almenn aðild að sænsku samtökunum miðast við einstaklinga sem starfa við innkaup hjá opinberum aðilum. Samþykktir þeirra heimila jafnframt stuðningsaðild annarra einstaklinga sem að mati stjórnar leggja opinberum innkaupum lið. Stuðningsfélagar geta tekið þátt í viðburðum og fengið upplýsingar frá samtökunum en hafa ekki atkvæðisrétt.
Lögmenn og einkareknir ráðgjafar koma töluvert að fræðslustarfi sænsku samtakanna, meðal annars sem fyrirlesarar á ársráðstefnum þeirra. Á ráðstefnunni árið 2025 fluttu Paula Hägg og Charlotta Strengberg frá Colligio erindi um samningaviðræður í innkaupaferlum. Á ráðstefnunni árið 2026 fjallaði Hannes Härfast frá EFFSO um nýleg dómsmál á sviði opinberra innkaupa ásamt Pernillu Rasiwala frá lögmannsstofunni Elici. Colligio og EFFSO eru einkarekin ráðgjafafyrirtæki sem veita opinberum aðilum innkauparáðgjöf og þjónustu við framkvæmd útboða, þar á meðal gerð útboðsgagna og lögfræðilega ráðgjöf vegna innkaupa og samningsgerðar.
Í Danmörku starfa sambærileg samtök undir heitinu IKA – Foreningen af Offentlige Indkøbere. Auk aðildar opinberra aðila bjóða þau sérstaklega upp á aðild fyrir ráðgjafa sem framkvæma útboð fyrir hönd opinberra aðila og starfrækja tengslanet fyrir birgja. Á opinberum félagalista IKA eru meðal annars ráðgjafafyrirtækin FORTEM og Udbudspartner, auk lögmannsstofa á borð við DLA Piper, Accura og Kromann Reumert. Starfsemin veitir þannig opinberum innkaupaaðilum og einkareknum ráðgjöfum vettvang til fræðslu og þekkingarmiðlunar.
