Ólögmætt samráð
- Ritstjóri
- Dec 10, 2025
- 2 min read
Danska Samkeppnis- og neytendastofnunin (Konkurrence- og Forbrugerstyrelsen) hefur tekið saman lista yfir 12 vísbendingar sem allar geta bent til þess að um sé að ræða ólögmætt samráð milli fyrirtækja í tengslum við framkvæmd opinberra innkaupa.
Slíkt samráð getur komið fram með ýmsum hætti við undirbúning, framsetningu og mat tilboða. Stundum birtist það í því hvernig tilboð eru skrifuð og uppbyggð, en í öðrum tilvikum í verðlagningu eða í mynstrum sem koma fram þvert á fleiri en eitt útboð. Hér á eftir eru rakin viðvörunarmerkin samkvæmt listanum:
Vísbendingar í tilboðsgögnum bjóðenda
Afritun: Framlögð tilboð eru mjög lík hvert öðru, til dæmis að þau byggist á sams konar útreikningum, hafi sama tilboðsverð, sömu skjöl eða sambærilegt orðalag í tilboðsgögnum, jafnvel með sömu stafsetningarvillum.
Trúnaðarupplýsingar: Upplýsingar í tilboði gefa til kynna að bjóðandi hafi vitneskju um trúnaðarupplýsingar úr öðrum tilboðum.
Sameiginleg einkenni í lýsigögnum: Lýsigögn (e. metadata) tilboðsgagna bera sameiginleg einkenni og/eða óeðlileg frávik, sem geta bent til þess að sami aðili hafi útbúið tilboðsgögn fyrir fleiri en einn bjóðanda eða að bjóðandi hafi stuðst við tilboðsgögn annars bjóðanda.
Vísbendingar í tilboðsverðum
Óeðlilega há tilboð: Tilboð eru mun hærri en búast hefði mátt við miðað við eðlilegar markaðsaðstæður.
Einsleit verðhegðun: Sambærilegar hækkanir á tilboðsverðum hjá bjóðendum, án þess að málefnalegar eða markaðstengdar skýringar liggi fyrir.
Óeðlilega lág tilboð: Tilboð frá nýjum bjóðendum eru óeðlilega lág miðað við eðli verks, vöru eða þjónustu.
Hegðunarmynstur í tilboðsgerð
Bjóðendur skiptast á að leggja fram lægsta tilboðið: Bjóðendur skiptast kerfisbundið á að leggja fram lægsta tilboðið í útboðum.
Val á undirverktökum: Fyrirtæki sem valið er í opinberu innkaupaferli nýtir ætíð sama undirverktaka sem jafnframt er samkeppnisaðili annarra bjóðenda, eða undirverktökum er kerfisbundið skipt á milli fyrirtækja.
Beiðni um skiptingu innkaupa: Fyrirtæki eða bjóðendur óska eftir því að innkaup séu útfærð þannig að þeim sé skipt milli nokkurra seljenda innan sama samnings, í stað þess að einn seljandi verði valinn, þegar slík útfærsla er ekki réttlætanleg með tilliti til umfangs eða markaðsaðstæðna.
Sigurvegara- og taparamynstur: Sömu bjóðendur vinna ár eftir ár sama hlutfall útboða, eða virðast vinna útboð á tilteknum sviðum eða á afmörkuðum landsvæðum.
Mynstur í tilboðsfjárhæðum: Tilteknir bjóðendur leggja ávallt fram hæstu eða lægstu tilboðin í tilteknum verkefnum eða á ákveðnum landsvæðum.
Lítil þátttaka: Sum fyrirtæki bjóða ekki í verkefni, þrátt fyrir að þau geri það að jafnaði og hafi bæði getu og burði til þess, án þess að skýrar og málefnalegar ástæður liggi fyrir.
Heimild:
Comments